Fermingar 2023

Hér er hægt að skrá börn í fermingarfræðslu veturinn 2022 – 2023.

Fermingarathafnir ársins 2023 verða:

  • Pálmasunnudagur 2. apríl

  • Sumardagurinn fyrsti 20. apríl

  • Mæðradagurinn 14. maí

  • Sjómannadagurinn 4. júní

Fermingardagurinn er hjá mörgum einstaklingum einn af eftirminnilegustu dögum ævinnar. Fermingarfræðsla þjóðkirkjunnar hefst á haustdögum, þá kemur saman hópur ungmenna með starfsfólki kirkjunnar og fermingarveturinn hefst.

Hópurinn kynnist - sumir þekkjast vel á meðan aðrir eru að hittast í fyrsta skipti. Á vetrarleiðinni bætast oft fleiri við og þegar fermningar hefjast á vormánuðum er komin vinatenging og félagslegur skyldleiki sem oft heldur út lífsgönguna.

Ferming þýðir staðfesting. Staðfesting þess að fermingarbarnið vill þiggja þá samfylgd með Guði sem beðið var fyrir í skírninni. Eftir fræðslu um kjarna kristinnar trúar fer fermingarbarnið með trúarjátninguna, vinnur fermingarheit og þiggur fyrirbæn og blessun.

277492606_2068819809958898_883862439059405913_n.jpg

Ferming 2023

Miðað er við að fermingarathafnir hefjist kl. 11.00. Ef fleiri en 16 börn skrá sig til að fermast við sömu athöfn er reynt að skipta hópnum í tvennt og er þá önnur fermingarathöfn sama dag kl. 13.30.

Öll sóknarbörn í Laugarnessókn fædd 2009 og forráðamenn þeirra eiga að fá bréf frá Laugarneskirkju í sumar þar sem þeim er boðin þátttaka í fermingarfræðslunni næsta vetur.

 

Að sjálfsögðu eru þó allir velkomnir, bæði börn búsett í öðrum sóknum og börn sem af einhverjum ástæðum eru ekki skráð í Þjóðkirkjuna. Boðsbréfið aðeins er sent sóknarbörnum okkar. Opið verður fyrir skráningar eitthvað fram á veturinn.

Fermingarundirbúningur kirkjunnar verður í höndum sóknarprests, sr. Davíðs Þórs Jónssonar og verkefnastjóra æskulýðsstarfsins.

Fermingarfræðslan sjálf fer fram á þriðjudögum kl. 15:15 – 16:45 frá og með 6. september, en auk hennar er gerð sú krafa að ungmennin og fjölskyldur þeirra sæki guðsþjónustur og fræðslukvöld og að börnin sæki fermingarnámskeið í Vatnaskóg í haust.

Athugið að skráning í fermingarfræðsluna jafngildir ekki skuldbindingu um að fermast í vor, ungmennin gera upp hug sinn í vetur á grundvelli fermingarfræðslunnar.

Kostnaður:
Fræðslugjald vegna fermingarfræðslu er innheimt einu sinni yfir veturinn. Gjaldið fylgir gjaldskrá Prestafélags íslands. Að auki er innheimt 2.000 kr. gjald fyrir hreinsun á fermingarkirtli. Arionbanki annast innheimtu og mun krafa birtast í heimabanka greiðanda.

Útlagður kostnaður vegna ferðarinnar í Vatnaskóg hefur verið 10 til 12 þúsund krónur, en sóknarnefnd Laugarneskirkju og prófastdæmið niðurgreiða að hluta kostnað ferðarinnar.

Nákvæm fjárhæð verður tilkynnt um leið og hún liggur fyrir.

Fyrirspurnir um starfið má senda á sr. Davíð Þór Jónsson í póstfangið davidthor@laugarneskirkja.is

Bestu kveðjur
sr. Davíð Þór og starfsfólk Laugarneskirkju.