Markmið fermingarfræðslunnar er að styðja unglingana í því að vera
sjálfstæðir siðferðislegir gerendur í eigin lífi.

Prestar safnaðarins kynna fyrir þeim allar helstu sagnir Gamla testamentisins þar sem útlistað er hvað það merkir að vera ábyrgur ráðsmaður í hinni góðu sköpun Guðs.  

Við kynnum þeim Jesú Krist og frásagnir Guðspjallanna af honum sem sýna ást Guðs á öllum mönnum og það hvernig Guð gefur sjálfan sig heiminum til þess að við getum gefist náunganum og iðkað réttlæti.  Loks fjöllum við um heilagan anda sem kallar alla menn til að mynda samfélag kirkjunnar þar sem enginn er útundan en maður og náttúra eru í heiðri höfð í Jesú nafni.

Þannig eru hinar hagnýtu og heilbrigðu trúarsetningar kristinnar kirkju útskýrðar í fermingarfræðslunni; trúin á Guð skaparann, frelsarann og heilagan anda.

Þá er það líka von okkar að hvert fermt barn eigi í farteski sínu minninguna
um það að hafa mætt góðu fullorðnu fólki í kirkjunni sinni sem hafði áhuga á
því sem þau voru að hugsa.  Þá ábyrgð bera allir starfsmenn safnaðarins og
raunar söfnuðurinn allur, því þegar upp er staðið er fermingarfræðslan
tilboð frá samfélagi hinna fullorðnu til unglingasamfélagsins um að hefja
nýtt samtal þar sem raunveruleg lífsgildi eru til umræðu á þroskaðan hátt.